اوره ک ده نگران،گؤزده نگران(کریم مشروطه چی)

 

بو گئجـــه، ندنسه، اضطرابلــی یام،

اوره ک ده نگــــران، گؤزده نگران.

بوغازدان ائنمه ییر یئدیگیم چؤٍره ک،

چؤٍره ک ده نگــران، دوز دا نگــــران.

اوستوندن بیر قورتوم آیران ایچیرسـن،

آیران دا نگــــران، بـــوزدا نگـــــران.

نگران، تک بیر من، بیر عیـال دگیل،

اوغـــلان دا نگــران، قیزدا نگــــران.

بیر مصراع یازماغا، اوره ک قیزیرسا،

قلم ده نگـــــران، سؤزده نگـــــــران.

وحشتده گؤرمورم تک یایی، قیشی،

پاییزدا نگــــــــران، یازدا نگـــــران.

بو زامان نگــران بیر ـ ایکی دگیل،

اَللی ده نگــــــران، یوزده نگــــــران.

دینلمک ایستیرسن بیرعاشیق سسین،

نغمه ده نگـــــران، سازدا نگــــران.

حسرتلـــه قویـــلادیم کتـــابلاریمی،

تورپاق دا نگـــران، توزدا نگــــــران.

یاندیردیم ایستـــه کلی نغمه لریمی،

آلوو دا نگران، کـــؤٍز ده نگــــران.

سئوگی نشریه مـی هاردا باسدیریم؟

چارپای دا نگــران، میزده نگــــران.

دئییرم: یاواشجــا قیسدیریم سیـزه،

گؤٍروره م من کیمـی، سیزده نگران.

بیر آنلیق باســیرام آیاقــــــلاریما،

توپوق دا نگـــران دیزده نگـــــران.

یانیلما دوٍز دئسن قورتولاجاقسـان،

یالان دا نگـــران، دوٍزده نگـــــران.

ایستیره م سیغینـام همســـایالارا،

قونشــولار دإییرلر: بیزده نگـــران!

گئنیشلیک نگـــران، دارلیق نگران،

دئمه لی بوسبوتون وارلیق نگــران

/ 0 نظر / 43 بازدید